BEOWULF
a new critical text based on an examination of the original MS
Images of the Beowulf MS are reproduced by kind permission of the British Library Board (who retain copyright)
All other material on this site under copyright 2002-5, Benjamin Slade
Please include proper citation reference if quoting a short passage;
otherwise no part of these documents may be reproduced without expressed permission from the author.
last updated on 15-June-2005

XXV
BEOwulf maþelode   bearn ecgþeowe(s)
hwæt we þe þas saélac     sunu healfdene(s)
leod scyldinga      lustum brohton 1653
tires to tacne      þe þu her to locast.
ic þ unsofte    ealdre gedigde
wigge under wætere     weorc geneþde
earfoðlice      ætrihte wæs
guð getwæfed   nymðe mec god scylde. 1658
Ne meahte ic æt hilde    mid hruntinge
wiht gewyrcan      þeah þ wæpen duge.
ac me geuðe ylda waldend
þ ic on wage geseah    wlitig / (ha)ngian 166v
ealdsweord eacen      oftost wisode 1663
(wi)nigea leasum      þ ic ðy wæpne gebræd.
(of)sloh ða æt þære sæcce     þa me sæl (a)geald
huses hyrdas      þa þ hildebil
for(ba)rn brogdenmæl.    swa þ blod gesprang
(ha)tost heaþoswata     ic þ hilt þanan 1668
feon(d)um ætferede     fyrendæda wræc
deað(c)wealm denigea     swa hit gedefe wæs.
ic (h)it þe þonne gehate     þ þu on heorote most
(so)rhleas swefan      mid þinra secga gedryht
(7) þegna gehwylc     þinra leoda 1673
duguðe 7 iogoþe     þ þu him 7rædan ne þearft
þeoden scyldinga     on þa healfe
aldorbealu eorlum      swa þu ær dydest.
ða wæs gyldenhilt    gamelum rince
harum hildfruman      on hand gyfen 1678
enta ærgeweorc     hit on æht gehwearf
æfter deofla hryre    denigea frean
wundorsmiþa geweorc     7 þa þas worold ofgeaf
gromheort guma      godes andsaca
morðres scyldig     7 his modor eac 1683
on geweald gehwearf      woroldcyninga
ðæm selestan    be / sæm tweonum 167r
ðara þe on scedenigge     (sceat)tas dælde.
hroðgar maðelode     hylt sceawode
ealde lafe     on ðæm wæs or (wri)ten 1688
fyrngewinnes.      syðþan flod ofs(loh)
gifen geotende      giganta cyn
frecne (ge)ferdon      þ wæs fremde þeod
ecean dryh(tne)      him þæs endelean
þurh wæteres wylm    waldend sealde. 1693
Swa wæs on ðæm scen(num)    sciran goldes
þurh runstafas    rihte (ge)mearcod
geseted 7 gesæd     hwam þ sweo(rd) geworht
irena cyst      ærest wære
w(reo)þenhilt 7 wyrmfah     ða se wisa spræc 1698
s(u)nu healfdenes      swigedon ealle.
þ la mæg secgan     se þe soð 7 riht
fremeð on folce     feor eal gemon
eald eðel wea(rd)   þ ðes eorl wære
geboren betera      blæd (is) aræred 1703
geond widwegas      wine min beo[wulf]
ðin ofer þeoda gehwylce     eal þu hit geþyldum healdest
mægen mid modes snyttrum    ic þe sceal mine gelæstan
freoðe swa wit furðum spræcon     ðu scealt to frofre weorþan 1707
eal langtwidig      leodum þinum
/ (hæl)eðum to helpe      ne wearð heremod (swa) 167v
eaforum ecgwelan      ar-scyldingum.
(Ne) geweox he him to willan     ac to wælfeal(le)
7 to deaðcwalum    deniga leodum 1712
breat (bo)lgenmod      beodgeneatas
eaxlge(ste)allan      oþ þ he ana hwearf
mære þeo(d)en.    mondreamum from
ðeah þe hine (mi)htig god    mægenes wynnum
eafeþum (ste)pte    ofer ealle men 1717
forð gefreme(d)e     hwæþere him on ferhþe greow
breost(h)ord blodreow     nallas beagas geaf.
denum æfter dome     dreamleas gebád
þ he þæs gewinnes    w{æ}rc þrowade
leodbea(l)o longsum     ðu þe lær be þon 1722
gumcyste ongit. á ic þis gid be þe
awræc wintrum frod     wundor is to secganne
hu mihtig god      manna cynne
þurh sidne sefan    snyttru bryttað
eard 7 eorlscipe      he ah ealra geweald 1727
hwilum he on lufan      læteð hworfan
monnes modgeþonc    mæran cynnes.
Seleð him on eþle    eorþan wynne
to healdanne      hleoburh wera
/ gedeð him swa gewealdene       worolde (dæ)las 1732 168r
side rice      þ he his selfa ne m(æg)
(for) his unsnyttrum     ende geþencean.
w(unað) he on wiste     no hine wiht dweleð
ad(l) ne yldo     ne him inwitsorh
on sefa<n> sweorceð     ne gesacu ohwær 1737
ecghe(te) eoweð     ac him eal worold
wendeð on w(il)lan     he þæt wyrse ne con.