BEOWULF
a new critical text based on an examination of the original MS
Images of the Beowulf MS are reproduced by kind permission of the British Library Board (who retain copyright)
All other material on this site under copyright 2002-5, Benjamin Slade
Please include proper citation reference if quoting a short passage;
otherwise no part of these documents may be reproduced without expressed permission from the author.
last updated on 15-June-2005

XXVII
(Be)owulf maþelode     bearn ecgþeowes 1817
nu (w)e sæliðend    secgan wyllað
feorran cumene      þ we fundiaþ
higelac secan      wæron her tela
willum bewenede      þu us wel dohtest.
Gif ic þonne on eorþan    owihte mæg 1822
þinre modlufan    maran tilian.
gumena dryhten      ðonne ic gyt dyde
guðgeweorca      ic beo gearo sona.
gif ic þæt ge/ fricge  ofer floda begang 170r
þ þec ymbsittend    egesan þywað 1827
swa þec hete(nde)    hwilum dydon.
Ic ðe þusenda    þegna br(in)ge
hæleþa to helpe     ic on higelace wat
geata dryhten      þeah ðe he geong sy
folces hyrde      þ he mec fremman wile 1832
weordum 7 worcum   þ ic þe wel heri(ge)
7 þe to geoce    garholt bere
mægenes fultum     þær ðe bið manna þearf
g(if) him þonne hreþrinc   to hofum geata
geþinge{ð} þeodnes bearn     he mæg þær fela. 1837
freonda findan      feorcyþðe beoð
selran gesohte      þæm þe him selfa dea(h.)
Hroðgar maþelode    him on andsware
þe þa wordcwydas    wigtig drihten
on sefan sende      ne hyrde ic snotorlicor 1842
on swa geongum feore    guman þingian
þu eart mægenes strang    7 on mode frod
wis wordcwida      wen ic talige
gif þ gegangeð     þæt ðe gar nymeð
hild heorugrimme      hreþles eaferan 1847
adl oþðe iren    ealdor ðinne
folces hyrde     7 þu þin feorh hafast.
þ þe / (s)æ-geatas selran næbben 170v
to geceosen(ne)      cyning ænigne
hordweard hæleþa     (g)yf þu healdan wylt 1852
maga rice     me þin [m]odsefa
licað leng swa wel     leofa beo(w)ulf
hafast þu gefered    þ þam folcum (s)ceal
geata leodum     7 gar-denum
sib (g)emænum   7 sacu restan 1857
inwitniþas       (þe) hie ær drugon
wesan þenden ic weal(d)e    widan rices
maþmas gemæne     ma[n]ig oþerne
godum gegrettan      ofer ganotes bæð
sceal hringnaca ofer (h)eaþu bringan 1862
lác 7 luftacen      ic þa (l)eode wát
ge wið feond ge wið freond    fæste geworhte
æghwæs untæle    ealde wisan.
ða git him eorla hleo    {h}i{n}e gesealde
mago healfdenes      maþmas .xii. 1867
het inne mid þæm lacum    leode swæse
secean on gesyntum      snude eft cuman
gecyste þa      cyning æþelum gód
þeoden scyldinga     ðegn bet{o}stan
7 be healse genam     hruron him tearas 1872
blondenfeaxum      him wæs bega wen
ealdum in/ frodum     oþres swiðor 171r
þ h{i}e seoðða{n} <..>   geseon moston
modige on meþle    (wæs) him se man to þon leof
þ he þone (breost)wylm     forberan ne mehte. 1877
ac him (on) hreþre    hygebendum fæst
æfter d(eo)rum men    dyrne langað.
beorn wið bl(o)de     him beowulf þanan
guðrinc goldwlanc     græsmoldan træd
since h(re)mig      saégenga bad 1882
agedfrean       se (þe) on ancre rád
þa wæs on gange    gi(fu) hroðgares
oft geæhted      þ wæs an cyning
æghwæs orleahtre     oþ þ hin(e) yldo benam
mægenes wynnum     se þe oft manegum scod. 1887