BEOWULF
a new critical text based on an examination of the original MS
Images of the Beowulf MS are reproduced by kind permission of the British Library Board (who retain copyright)
All other material on this site under copyright 2002-5, Benjamin Slade
Please include proper citation reference if quoting a short passage;
otherwise no part of these documents may be reproduced without expressed permission from the author.
last updated on 15-June-2005

XXVIII
CWOM þa to flode    fela modigra
hægstealdra <..>       hringnet bæron
locene leoðosyrcan     landweard onfand
eftsið eorla      swa he ær dyde
no he mid hearme      of hliðes nosan 1892
/ (gæs)<tas> grette     ac him togeanes rad 171v
(cwæ)ð þ wilcuman    wedera leodum
sca(þan) scírhame    to scipe foron.
þa wæs (on) sande    sægeap naca
hladen here(wæ)dum    hringedstefna 1897
mearum 7 mað(m)um     mæst hlifade
ofer hroðgares      (h)ordgestreonum
he þæm batwearde    (bun)den golde
swurd gesealde      þ he syð(þan) wæs
on meodubence    maþma þy weo(rþ)re 1902
yrfelafe     gewat him on nacan
(d)refan deop wæter     dena land ofgeaf.
þa wæs be mæste    merehrægla sum
segl sale fæst     sundwudu þunede
no þær wegflotan    wind ofer yðum 1907
siðes getwæfde     sægenga for
fleat famigheals      forð ofer yðe
bundenstefna      ofer brimstreamas
þ hie geata clifu    ongitan meahton
cuþe næssas     ceol up geþrang 1912
lyftgeswenced       on lande stod.
hraþe wæs æt / holme      hyðweard geara 172r
se þe ær lange tid    leofra manna
fus æt faroðe    (feor) wlatode
sælde to sande    sidfæþme sci(p) 1917
oncearbendum fæst      þy læs hym yþ(a) ðrym
wudu wynsuman      forwrecan (meah)te
het þa up beran    æþelinga gestr(eon)
frætwe 7 fætgold     næs him feor þan(on)
to gesecanne      sinces bryttan. 1922
higelac hreþling     þær æt ham wunað
s(elfa) mid gesiðum    saéwealle neah
bold w(æs) betlic     bregorof cyning
heahealle      hygd swiðe geong
wis welþungen     þeah ðe wintra lyt 1927
under burhlocan      gebide(n) hæbbe
hæreþes dohtor     næs hio hnah swa þeah
ne to gneað gifa    geata leodum
maþmgestreona      mod þryðo {..} wæg
fremu folces cwen      firen 7rysne 1932
Nænig þ dorste    deor geneþan
swæsra gesiða     nefne sinfrea
þ hire an dæges    eagum starede
ac him wælbende.    /(w)eotode tealde 172v
handgewriþene;      hraþe (seo)þðan wæs 1937
æfter mundgripe    mece (g)eþinged
þ hit sceadenmæl    scyran |(m)oste
cwealmbealu cyðan     ne bið swylc (cwen)lic þeaw
idese to efnanne      þeah ðe (h)io ænlicu sy
þte freoðuwebbe    feores (on)sæce 1942
æfter ligetorne    leofne mannan
(h)uru þ on hoh snod   hemninges mæg
(eal)odrincende      oðer sædan
þ hio leod(b)ealewa    læs gefremede
inwitniða      [s]yððan ærest wearð 1947
gyfen goldhro(d)en      geongum cempan
æðelum diore      syððan hio offan flet
ofer fealone flod      be fæder lare
siðe gesohte      ðær hio syððan well
in gumstole     gode mære 1952
lifgesceafta      lifigende breac.
hiold heahlufan      wið hæleþa brego
ealles moncynnes      mine gefræge
þæs selestan      bi sæm tweonum
eormencynnes      forðam offa/ wæs 1957 173r
geofum 7 guðum     garcene man
wíd(e) (ge)weorðod     wisdome heold 
eðel sinne      þonon <on>geomor wóc
hæleðum to helpe     heminges mæg
nefa garmundes      niða cræftig:~ 1962