BEOWULF
a new critical text based on an examination of the original MS
Images of the Beowulf MS are reproduced by kind permission of the British Library Board (who retain copyright)
All other material on this site under copyright 2002-5, Benjamin Slade
Please include proper citation reference if quoting a short passage;
otherwise no part of these documents may be reproduced without expressed permission from the author.
last updated on 15-June-2005

III
Swa ða mælceare    maga healfdenes
singala seað   ne mihte snotor hæleð 190
wean onwendan   wæs þ gewin to swyð
laþ 7 longsum    þe on ða leode becom
nydwracu niþgrim    nihtbealwa mæst
þ fram ham gefrægn    higelaces þegn
god mid geatum   grendles dæda 195
se wæs moncynnes    mægenes strengest
on þæm dæge    þysses lifes
æþele 7 eacen    het him yðlidan
godne gegyrwan   cwæð he guðcyning
ofer swanrade   secean wolde 200
mærne þeoden    þa him wæs manna þearf
ðone siðfæt him    snotere ceorlas
lyt hwon logon.   / (Þeah) he him (l)eof wære 134v
hwetton hige(rofne)    (hæ)l sceawedon
hæfde se goda   geata leoda 205
(c)empan gecorone   þara þe he cenoste
findan mihte    .xv.na sum
sundwudu sohte   secg wisade
lagucræftig mon   landgemyrcu
fyrst forð gewat   flota wæs on yðum. 210
bát under beorge   beornas gearwe
on stefn stigon   streamas wundon
sund wið sande   secgas bæron
on bearm nacan   beorhte frætwe
guðsearo geatolic;    guman ut scufon 215
weras on wilsið   wudu bundenne.
gewat þa ofer wægholm    winde gefysed
flota famiheals   fugle gelicost
þ ymb antid    oþres dogores
wundenstefna   gewaden hæfde 220
þ ða liðende    land gesawon
brimclifu blican   beorgas steape.
side sænæssas    þa wæs sund liden
eoletes æt ende    þanon up hraðe
Wedera leode   on wang stigon. 225
sæwudu sældon    syrcan hrysedon.
guðgewædo    gode þancedon
þæs þe him yþlade    eaðe wurdon.
/ (Þa) of wealle geseah   weard scildinga 135r
se þe (holm)clifu    healdan scolde 230
beran ofer bolcan   beorhte randas
fyrdsearu fuslicu   hine fyrwyt bræc
modgehygdum   hwæt þa men wæron.
Gewat him þa to waroðe    wicge rid(an)
þegn hroðgares    þrymmum cwehte 235
mægenwudu mundum    meþelwordum frægn.
hwæt syndon ge    searohæbbendra
byrnum wer(e)de   þe þus brontne ceol
ofer lagustræte   lædan cwomon
hider ofer holmas     <...> 240
{h}e wæs endesæta    ægwearde heold
þe on land dena   laðra nænig
mid scipherge   sceðþan ne meahte
no her cuðlicor   cuman ongunnon.
lindhæbbende   ne ge leafnesword 245
guðfremmendra   gearwe ne wisson
maga gemedu   næfre ic maran geseah
eorla ofer eorþan    ðonne is eower sum
secg on searwum   nis þ seldguma              
wæpnum geweorðad    næf{n}e him his wlite leoge 250
ænlic ansyn    nu ic eower sceal
frumcyn witan   ær ge fyr / (heon)an 135v
leassceaweras   on land den(a)
furþur feran   nu ge feorbuend
mereliðende mi{n}ne gehyrað 255
anfealdne geþoht    ofost is selest
to gecyðanne   (h)wanan eowre cyme syndon.