BEOWULF
a new critical text based on an examination of the original MS
Images of the Beowulf MS are reproduced by kind permission of the British Library Board (who retain copyright)
All other material on this site under copyright 2002-5, Benjamin Slade
Please include proper citation reference if quoting a short passage;
otherwise no part of these documents may be reproduced without expressed permission from the author.
last updated on 15-June-2005

XXXVII  
ÐA  ic æt þearfe <gefrægn>      þeodcyninges 2694
andlongne eorl      ellen cyðan
cræft 7 cenðu     swa him gecynde wæs
ne hedde he þæs heafolan     ac sio hand gebarn
modiges mannes      þær he his mægenes. healp
þ he þone niðgæst    nioðor hwene sloh. 2699
secg on searwum      þ ðæt sweord gedeaf
fah 7 fæted;    þ ðæt fýr ongon
sweðrian syððan     þa gen sylf cyning.
geweold his gewitte     wællseaxe gebræd
biter 7 beaduscearp     þ he on byrnan wæg 2704
forwrat wedra / helm    wyrm on middan 189r
feond gefyldan      ferh ellen wræc
7 hi hyne þa begen    abroten hæfdon
sibæðelingas      swylc sceolde secg wesan.
þegn æt ðearfe     þ ðam þeodne wæs 2709
siðas sigehwile  sylfes dædum
wo(rlde) geweorces.      ða sio wund ongon
þe him se e(orð)draca    ær geworhte
swelan 7 swella(n)     (he) þ sona onfand
þ him on breostum    beal(onið) weoll 2714
attor on innan      ða se æðeling gion(g)
þ he bi wealle    wishycgende
gesæt on sesse     seah on enta geweorc
hu ða stanbogan      stapulum fæste
ece eorðreced      innan heald(e)[n] 2719
hyne þa mid handa     heorodreorigne
(þeo)den mærne     þegn ungemete till
winedry(hten) his      wætere gelafede
hilde sædne      7 his he(l)<m> onspeon.
biowulf maþelode     he ofer be(nne) spræc 2724
wunde wælbleate     wisse he gearwe
þ he dæghwila    gedrogen hæfde
eorðan wyn<ne>      ða wæs eall sceacen
dogorgerimes      deað ungemete neah
nu ic suna minum      syllan wolde 2729
guðgewædu       þær me gifeðe swa
ænig yrfe/ weard    æfter wurde 189v
lice gelenge     ic ðas leo(de) heold.
fiftig wintra      næs se folccyning
ymbesittendra      ænig ðara 2734
þe mec guðwinum    (gr)etan dorste
egesan ðeon      ic on earde bád
(m)ælgesceafta      heold min tela
ne sohte (s)earoniðas     ne me swor fela
aða on un(ri)ht     ic ðæs ealles mæg 2739
feorhbennum seoc      ge(fea)n habban
forðam me witan ne ðearf     waldend fira
morðorbealo maga     þonne min sceaceð
líf of lice     nu ðu lungre geong
hord sceawian      under harne stan. 2744
wiglaf leofa     nu se wyrm ligeð
swefeð sare wund     (si)nce bereafod
bio nu on ofoste      þ ic ærwelan
goldæht ongite     gearo sceawige
swegle searogimmas      þ ic ðy seft mæge 2749
æfter maððumwelan    (mi)n alætan
líf 7 leodscipe      þone ic longe heold:~