BEOWULF
a new critical text based on an examination of the original MS
Images of the Beowulf MS are reproduced by kind permission of the British Library Board (who retain copyright)
All other material on this site under copyright 2002-5, Benjamin Slade
Please include proper citation reference if quoting a short passage;
otherwise no part of these documents may be reproduced without expressed permission from the author.
last updated on 16-July-2005

XLII
Þa wæs gesyne    þ se sið ne ðah 3058
þam ðe unrihte    inne gehydde
wræce under wealle     weard ær ofsloh
feara sumne      þa sio fæhð gewearð
gewrecen wraðlice     wundur hwar þonne
eorl ellenróf      ende gefere. 3063
lifgesceafta      þonne leng ne mæg
mon mid his [m]{æ}gum     meduseld buan
swa wæs biowulfe.   /þa he biorges weard 196r
sohte searoniðas     seolfa ne cuðe
þurh hwæt his worulde gedal    weorðan sceolde.   3068
swa hit oð domes dæg    diope benemdon
þeodnas mære     þa ðæt þær dydon
þ se secg wære    synnum scildig
hergum geheaðerod     hellbendum fæst
wommum gewitnad      se ðone wong str{u}de 3073
næs he goldhwæte    gearwor hæfde
agendes est      ær gesceawod.
wigláf maðelode     wihstanes sunu
oft sceall eorl monig     anes willan
wræc adreog{an}     swa us geworden is 3078
ne meahton we gelæran    leofne þeoden
rices hyrde      ræd ænigne
þ he ne grette    goldweard þone
lete hyne licgean      þær he longe wæs
wicum wunian      oð woruldende 3083
heoldon heahgesceap     hord ys gesceawod
grimme gegongen      þ gifeðe <wæs>
to swið þe ðone <..>   þyder ontyhte.
Ic wæs þær inne    7 þ eall geondseh
recedes geatwa      þa me gerymed wæs 3088
nealles swæslice    sið alyfed
inn under eorðweall     ic on ofoste gefeng
micle mid mundum      mægenbyrðenne
hordgestreona      hider / ut ætbær 196v
cyninge minum      cwico wæs þa gena 3093
wis 7 gewittig      worn eall gespræc
gomol on gehðo      7 eowic gretan het
bæd þ ge geworhton    æfter wines dædum
in bælstede      beorh þone hean
micelne 7 mærne     swa he manna wæs 3098
wigend weorðfullost    wide geond eorðan
þenden he burhwelan    brucan moste.
Uton nu efstan      oðre <siðe>
seon 7 secean      <on> searogeþræc
wundur under wealle     ic eow wisige 3103
þ ge genoge    neon sceawiað
beagas 7 brad gold     sie sio bær gearo
ædre geæfned     þonne we ut cymen
7 þonne geferian    frean userne
leofne mannan      þær he longe sceal 3108
on ðæs waldendes    wære geþolian.
het ða gebeodan     byre wihstanes
hæle hildedior     hæleða monegum
boldagendra      þ hie bælwudu
feorran feredon      folcagende 3113
godum togenes      nu sceal gled fretan
weaxan wonna leg      wigena strengel
þone ðe oft gebád    isernscure
þonne stræla storm   strengum gebæded
scoc ofer scildweall     sceft nytte heold 3118
fæ[ð]ergearwum fús     flane fulleode.
huru se snotra      sunu wihstanes
acigde of corðre     / cyniges þegnas 198r
s[yf]on[e] <tosom>[n]e   þa selestan
eode eahta sum      under inwithróf 3123
(h)ilderinc sum  on handa bær
æledleoman.      se ðe on orde geong
næs ða on hlytme     hwa þ hord strude
syððan orwearde    ænigne dæl
secgas gesegon     on sele wunian 3128
læne licgan      lyt ænig mearn
þ hi ofostli(c)<e>   ut geferedon
dyre maðmas      dracan ec scufun
wyrm ofer weallclif     leton weg niman
flod fæðmian    frætwa hyrde 3133
þ wæs wundengold  on wæn hladen
æghwæs unrim     æþelinge boren
har{um} hilde <..>,     to hrones næsse:~