BEOWULF
a new critical text based on an examination of the original MS
Images of the Beowulf MS are reproduced by kind permission of the British Library Board (who retain copyright)
All other material on this site under copyright 2002-5, Benjamin Slade
Please include proper citation reference if quoting a short passage;
otherwise no part of these documents may be reproduced without expressed permission from the author.
last updated on 16-July-2005

V
Stræt wæs stanfah    stig. wisode 320
gumum ætgædere    guðbyrne scan
heard hondlocen   hringiren scir
song in searwum   þa hie to sele furðum
in hyra gryregeatwum   gangan cwomon
setton sæmeþe    side scyldas 325
rondas regnhearde   wið þæs recedes weal.
bugon þa to bence    byrnan hringdon
guðsearo gumena   garas stodon
sæmanna searo   samod ætgædere
æscholt ufan græg    wæs se irenþreat 330
wæpnum gewurþad    þa ðær wlonc hæleð
oretmecgas   æfter hæleþum frægn.
hwanon ferigeað ge    fætte scyldas
græge syrcan    7 grimhelmas
heresceafta heap   ic eom hroðgares 335
ár 7 ombiht.   ne seah ic elþeodige
þus manige men   modiglicran.
wen ic þ. ge for wlenco    nalles for wræcsiðum.
ac for hige/ (þry)mmum    hroðgar sohton. 137v
him þa elle(n)rof    andswarode 340
wlanc wedera leod.   word æfter spræc
heard under helme   we synt higelaces
beodgeneatas   beowulf is min nama
wille ic asecgan   sunu healfdenes
mærum þeodne    min ærende. 345
aldre þinum   gif he us geunnan wile
þ we hine swa godne    gretan moton.
wulfgar maþelode    þ wæs wendla leod
wæs his modsefa   manegum gecyðed.
wig 7 wisdom   ic þæs wine deniga 350
frean scildinga   frinan wille
beaga bryttan   swa þu bena eart
þeoden mærne    ymb þinne sið.
7 þe þa andsware    ædre gecyðan
ðe me se goda   agifan þenceð. 355
hwearf þa hrædlice    þær hroðgar sæt
eald 7 {a}nhár    mid his eorla gedriht.
eode ellenrof   þ he for eaxlum gestod
deniga frean   cuþe he duguðe þeaw.
wulfgar maðelode    / to [h]i(s) winedrihtne 360 138r
her syndon ge(fere)de    feorran cumene
ofer geofenes (be)gang    geata leode
þone yldestan   ore(t)mecgas.
beowulf nemnað   hy benan synt
þ hie þeoden min     wið þe moton 365
wordum wrixlan   no ðu him wearne geteoh
ðinra gegncwida   glædman. hroðgar
hy on wiggetawum    wyrðe þinceað.
eorla geæhtlan   huru se aldor deah
se þæm heaðorincum    hider wisade. 370