BEOWULF
a new critical text based on an examination of the original MS
Images of the Beowulf MS are reproduced by kind permission of the British Library Board (who retain copyright)
All other material on this site under copyright 2002-5, Benjamin Slade
Please include proper citation reference if quoting a short passage;
otherwise no part of these documents may be reproduced without expressed permission from the author.
last updated on 15-June-2005

VI
Hroðgar maþelode    helm scyldinga
ic hine cuðe   cnihtwesende
wæs his ealdfæder    ecgþeo haten
ðæm to ham forgeaf    hreþel geata
angan dohto(r)   is his eaforan nu 375
heard her cumen   sohte holdne wine.
ðonne sægdon þ    sæliþende
þa ðe gifsceattas    geata fyredon
þyder to þance    þ he .xxx/(tig)es 138v
manna mægencræft    on his (mund)gripe 380
heaþorof hæbbe    hine halig god
for arstafum   us onsende
to west-denum   (þ)æs ic wen hæbbe.
wið grendles gryre    (ic) þæm godan sceal
for his modþræce    (m)admas beodan 385
beo ðu on ofeste   hát in gán
seon sibbegedriht   samod ætgædere.
gesaga him eac wordum    þ hie sint wilcuman
deniga leodum   <...>
<...> word inne abead. 390
eow het secgan   sigedrihten min
aldor east-dena   þ he eower æþelu can
7 ge him syndon   ofer sæwylmas
heardhicgende   hider wilcuman
nu ge moton gangan   in eowrum guðgeatawum
under heregriman   hroðgar geseon 396
lætað hildebord    her onbidan
wuduwælsceaftas   worda geþinges.
aras þa se rica    ymb hine rinc manig
þryðlic þegna heap    sume þær bidon
heaðoreaf heoldon    swa him se / (hea)rda bebead. 401 139r
snyredon ætsomn(e)    (þa) secg wisode
under heorotes hrof       <...>
hea[rd] under helme   þ he on heoðe gestod.
beowulf maðelode   on him byrne scan
sea[ro]net seowed   smiþes orþancum 406
wæs þu hr(oð)gar hal     ic eom higelaces
mæg 7 magoðegn.    hæbbe ic mærða fela
ongunnen on geogoþe    me wearð grendles þing.
on minre eþeltyrf    undyrne cuð
secgað sæliðend    þ þæs sele stande 411
reced selesta   rinca gehwylcum
idel 7 unnyt   siððan æfenleoht
under heofenes hador   beholen weorþeð.
þa me þ gelærdon    leode mine
þa selestan   snotere ceorlas. 416
þeoden hroðgar    þ ic þe sohte
for þan hie mægenes cræft    mine cuþon.
selfe ofersawon   ða ic of searwum cwom.
fah from feondum   þær ic fife geband
yðde eotena cyn    7 on yðum slog. 421
niceras nihtes   nearoþearfe dreah
wræc. / (Wed)[e]ra nið    wean ahsodon 139v
forgrand g(ra)mum    7 nu wið grendel sceal
wið þam aglæcan    ana gehegan.
ðing wið þyrse    (ic) þe nu ða 426
brego beorht-dena   biddan wille
eodor scyldinga   anre bene.
þ ðu me ne forwyrne    wigendra hleo
freowine (f)olca   nu ic þus feorran com.
þ ic mote ana    minra eorla gedryht. 431
ond þes hearda heap    heorot fælsian
hæbbe ic eac geahsod    þ se æglæca
for his wonhydum   wæpna ne recceð.
ic þ þonne forhicge    swa me higelac sie
min mondrihten    modes bliðe. 436
þ ic sweord bere    oþðe sidne scyld
geolorand to guþe.    ac ic mid grape sceal
fon wið feonde   7 ymb feorh sacan
lað wið laþum    ðær gelyfan sceal
dryhtnes dome   se þe hine deað nimeð. 441
wen ic þ he wille    gif he wealdan mót
in þæm guðsele    geotena leode
etan unforhte   swa he / oft dyde 140r
mægenhreð manna    na (þu) minne þearft
hafalan hydan.   ac he me habban wile 446
deore fahne   gif mec deað nimeð.
byreð blodig wæl    byrgea(n) þenceð
eteð angenga   unmurnlice
mearcað morhopu   no ðu ymb mines ne þearft
lices feorme   leng sorgian. 451
Onsend higelace   gif mec hild nime
beaduscruda betst   þ mine breost wereð
hrægla selest   þ is hrædlan laf
welandes geweorc   gæð a wyrd swa hio scel.