BEOWULF
a new critical text based on an examination of the original MS
Images of the Beowulf MS are reproduced by kind permission of the British Library Board (who retain copyright)
All other material on this site under copyright 2002-5, Benjamin Slade
Please include proper citation reference if quoting a short passage;
otherwise no part of these documents may be reproduced without expressed permission from the author.
last updated on 15-June-2005

VIII
HVNferð maþelode    ecglafes bearn                     
þe æt fotum sæt    frean scyldinga.           
onband beadurune    wæs him beowulfes sið             501
modges merefaran   micel æfþunca.
forþon þe he ne uþe    þ ænig oðer man
æfre / mærða þon ma middangeardes 141v
gehedde under heofenum    þonne he sylfa
eart þu se beowulf    se þe wið brecan wunne              506
on sidne saé   ymb sund flite
ðær git for wlence    wada cunnedon
7 for dolgilpe   on deop wæter
aldrum neþdon   ne inc ænig mon
ne leof ne lað   belean mihte 511
sorhfullne sið   þa git on sund reon.
þær git eagorstream    earmum þehton
mæton merestræta    mundum brugdon
glidon ofer garsecg   geofon yþum
weol wintrys wylm    git on wæteres æht 516
seofon niht swuncon   he þe æt sunde oferflat.
hæfde mare mægen    þa hine on morgentid
on heaþo-ræmes    holm up ætbær
ðonne he gesohte   swæsne   [eðel]
leof his leodum    lond brondinga 521
freoðoburh fægere    þær he folc ahte
burh 7 beagas.   / beot eal wið þe 142r
sunu beanstanes   so[ðe] gelæste.
ðonne wene ic to þe    wyrsan (ge)þingea
ðeah þu heaðoræsa    gehwær dohte 526
grimre guðe   gif þu grendl(es) dearst
nihtlongne fyrst   nean bi(dan)
beowulf maþelode    bearn ecgþeowes
hwæt þu worn fela    wine min hunfer(ð)
beore druncen   ymb brecan spræce 531
sægdest from his siðe    soð ic talige
þ ic merestrengo    maran ahte
earfeþo on yþum    ðonne ænig oþer man.
wit þ gecwædon     cnihtwesende
7 gebeotedon     wæron begen þa git 536
on geogoðfeore   þ wit on gársecg ut
aldrum neðdon   7 þ geæfndon swa.
hæfdon swurd nacod    þa wit on sund reon
heard on handa   wit unc wið hronfixas
werian þohton.   no he wiht fram me 541
flodyþum feor   fleotan meahte
hraþor on holme    no ic fram him wolde.
ða wit æt/ (s)omne    on saé wæron 142v
fif nihta fyrst   (o)þ þ unc flod todraf
wado weallende    wedera cealdost 546
nipende niht.   ond norþan(w)ind
heaðogrim 7hwearf    hreo wæron (y)þa
wæs merefixa   mod onhrered.
þær me wið laðum    licsyrce min
heard hondlocen    helpe gefremede 551
beadohrægl broden    on breostum læg
golde gegyrwed   me to grunde. teah
fah feondscaða   fæste hæfde.
grim on grape    hwæþre me gyfeþe wearð
þ ic aglæcan    orde geræhte 556
hildebille   heaþoræs fornam
mihtig meredeor   þurh mine hand