BEOWULF
a new critical text based on an examination of the original MS
Images of the Beowulf MS are reproduced by kind permission of the British Library Board (who retain copyright)
All other material on this site under copyright 2002-5, Benjamin Slade
Please include proper citation reference if quoting a short passage;
otherwise no part of these documents may be reproduced without expressed permission from the author.
last updated on 15-June-2005

VIIII
Swa mec gelome   laðgeteonan
þreatedon þearle    ic him þenode
deoran sweorde    swa hit gedefe wæs 561
næs hie ðære fylle    gefean hæfdon
manfordædlan    þ hie me þegon
symbel ymbsæton   saégrunde neah.
ac on mergenne    mecum / wunde 143r
be yðlafe   uppe lægon 566
swe<o[r]dum> aswefede    þ syðþan na
ymb bront(ne) ford    brimliðende
lade ne letton   (leoht) eastan com
beorht beacen godes   brimu swaþredon
þ ic sænæssas       geseon mihte 571
windige weallas    wyrd oft nereð
unfægne eorl   þonne his ellen deah.
hwæþere me gesælde    þ ic mid sweorde ofsloh
niceras nigene    no ic on niht gefrægn
under heofones hwealf   heardran feohtan 576
ne on egstreamum   earmran mannon.
hwaþere ic fara feng    feore gedigde
siþes werig   ða mec saé oþbær
flod æfter faroðe    on finna land.
wudu weallendu    no ic wiht fram þe 581
swylcra searoniða   secgan hyrde
billa brogan    breca næfre git
æt heaðolace.    ne gehwæþer incer
swa deorlice   dæd gefremede
fagum sweordum no ic þæs gylpe 586
þeah ðu þinum broðrum    to banan wurde
heafodmægum    þæs þu in / (hell)e scealt 143v
werhðo dreogan    þeah þin (wit) duge.
secge ic þe to soðe    sunu ecg(laf)es
þ næfre gre{n}del swa fela    gryra gefremede 591
atol æglæca    ealdre þinum.
hynðo on heorote    gif þin hige wære
sefa swa searogrim   swa þu self talast.
ac he hafað onfunden.    þ he þa fæhðe ne þearf
atole ecgþræce    eower leode 596
swiðe onsittan   sige-scyldinga
nymeð nydbade   nænegum arað.
leode deniga   ac he lust wigeð.
swefeð ond sendeþ.     secce ne weneþ
to gar-denum   ac ic him geata sceal 601
eafoð 7 ellen   ungeara nu
guþe gebeodan   gæþ eft se þe mót.
to medo modig   siþþan morgenleoht
ofer ylda bearn   oþres dogores
sunne sweglwered   suþan scineð. 606
þa wæs on salum    sinces brytta
gamolfeax 7 guðrof    geoce gelyfde
/ brego beorht-dena    gehyrde on (beo)wulfe 144r
folces hyrde   fæstrædne geþoht
ðær wæs hæleþa hleahtor     hlyn swynsode 611
word wæron wynsume       eode wealhþeow forð
cwen hroðgares    cynna gemyndig
grette goldhroden   guman on healle.
7 þa freolic wif    ful gesealde
ærest east-dena   eþelwearde 616
bæd hine bliðne    æt þær(e) beorþege
leodum leofne    he on lust geþeah
symbel 7 seleful    sigerof kyning
ymbeode þa    ides helminga
duguþe 7 geogoþe    dæl æghwylcne 621
sincfato sealde    oþ þæt sæl alamp
þ hio beowulfe     beaghroden cwen
mode geþungen    medoful ætbær.
grette geata leod    gode þancode
wisfæst wordum    þæs ðe hire se willa gelamp 626
þ heo on ænigne    eorl gelyfde
fyrena frofre    he þ ful geþeah
wælreow wiga   / (æt w)ealhþeon 144v
7 þa gyddode    guþe gefysed
beowulf maþelode     bearn ecgþeowes. 631
ic þæt hogode     þa ic on holm gestah.
sæbat gesæt     mid minra secga gedriht
þ ic anunga    eowra leoda
willan geworhte   oþðe on wæl crunge.
feondgrapum fæst     ic gefremman sceal 636
eorlic ellen    oþðe endedæg
on þisse meoduhealle    minne gebidan.
ðam wife þa word    wel licodon
gilpcwide geates    eode goldhroden.
freolicu folccwen    to hire frean sittan. 641
þa wæs eft swa ær    inne on healle
þryðword sprecen     ðeod on sælum
sigefolca sweg    oþ þ semninga
sunu healfdenes   secean wolde
æfenræste.   wiste þæm ahlæcan 646
to þæm heahsele    hilde geþinged.
siððan hie sunnan leoht    geseon meahton
oþðe nipende    niht ofer ealle
scaduhelma gesceapu    scriðan cwoman
wan under wolcnum    werod eall aras. 651
{ge}grette þa guma   [guman] oþerne
hroðgar beowulf    7 him hæl abead.
winærnes / geweald    7 þ word acwæð. 145r
Næfre ic ænegum men    ær alyfde
siþðan ic hond 7 rond    hebban mihte 656
ðryþærn dena     buton þe nu ða
hafa nu 7 geheald    husa selest
gemyne mærþo    mægenellen cyð
waca wið wraþum.    ne bið þe wilna gád
gif þu þ ellenweorc    aldre gedigest 661